చక్కనమ్మ చిక్కినా అందమే. అందుకే బాలీవుడ్ భామలంతా ఆమధ్య జీరోసైజ్ జపం చేశారు. కానీ లేటెస్ట్ గా రూట్ మార్చారు. ఇప్పుడంతా టోన్డ్ బాడీనే. ఈ లిస్టులో బాలీవుడ్ హీరోలు కూడా చేరిపోయారు. సిక్స్ ప్యాక్, ఎయిట్ ప్యాక్ పక్కనపెట్టి టోన్డ్ బాడీపై మోజు పడ్డారు. మన తెలుగు కుర్రహీరోలు కొందరు కూడా వీరినే ఫాలో అవుతున్నారు. ఇంకేం ఈ హీరోహీరోయిన్లంతా ఎప్పుడు చూసినా జిమ్ లలోనే దర్శనమిస్తున్నారు.
కండల వీరుడు సల్లూభాయ్... ప్రతి సినిమాలో ఒక్కసారైనా కండలు చూపిస్తాడు. లేకుంటే అభిమానులు ఊరుకోరట. ఇక తమ ఫ్యాన్స్ చిన్నబుచ్చుకుంటున్నారని కాబోలు షారుక్ ఖాన్, హ్రుతిక్ రోషన్ లు కూడా సినిమాల్లో కండలు చూపించారు. దీంతో వీరి అభిమానులు పండుగ చేసుకున్నారు. కానీ ఇప్పుడీ క్రేజ్ తగ్గి టోన్డ్ బాడీపై మోజు పెరిగింది. టోన్డ్ బాడీ అంటే... కాలి వేలి నుంచి తల వరకు అన్ని అవయవాలు సమపాళ్లలో ఉండాలి. బాడీలోని అధిక కొవ్వు కరిగించేయాలి. పొట్ట కండరాలు ఉబికి రావాలి. బరువు అదుపులో ఉండాలి. ఇక అమ్మాయిలైతే కాలిపిక్కలు, నడుము, పొట్టభాగం అన్నీ చెక్కిన శిల్పంలా అందంగా అమరాలి.
మొన్నటి సంజూబాబా నుంచి ఇటీవలే తెరంగేట్రం చేసిన రణ్ వీర్ సింగ్ దాకా అందరిదీ టోన్డ్ బాడీ బాటనే. ఓం శాంతి ఓంలో సిక్స్ ప్యాక్ తో అలరించిన షారుఖ్... ఆ తర్వాత వాటిపై పెద్దగా ఇంట్రస్ట్ చూపలేదు. కానీ ఇప్పుడు మళ్లీ జిమ్ లో కనిపిస్తున్నాడు. అట్రాక్టివ్ గా కనిపించేందుకు కండలకు పనిచెప్పాడు. ఈ న్యూ లుక్ తో చెన్నై ఎక్స్ ప్రెస్ మూవీలో అభిమానులను అలరించబోతున్నాడు కింగ్ ఖాన్. ఇక భారీ శరీరం. యాభై ఏళ్ల వయసు... అయినా సరే అందంగా కనిపించాలనే ఆరాటం సంజయ్ దత్ ది. కొత్త సినిమాలో టోన్డ్ బాడీతో కనిపించాలనే కసితో జిమ్ కే పరిమితమయ్యాడు సంజయ్ దత్. చాక్లెట్ బాయ్ గా ఇండస్ట్రీలో అడుగుపెట్టి సినిమా సినిమాకీ ఫిజిక్ పెంచుతున్న షాహిద్ కపూర్... ఇప్పుడు టోన్డ్ బాడీతో చెలరేగి పోతున్నాడు. ఇక వీరినే ఫాలో అవుతున్నారు మన కుర్రహీరోలు రానా, నవదీప్, సుధీర్. రానా ఏకంగా సిక్స్ ప్యాక్ తోపాటు టోన్డ్ బాడీతోనూ రెడీ అయిపోయాడు. ఈ ఫిజిక్ చూసి బిపాసా తెగ ఇంప్రెస్ అయిపోయిందట. రానాను పొగడ్తల్లో ముంచెత్తుతోందట.
వీళ్లేకాదు... హ్రుతిక్ రోషన్, జాన్ అబ్రహం, రణ్ వీర్ సింగ్, అర్జున్ రాంపాల్, సల్మాన్ ఖాన్ లు సైతం బాడీని టోన్డ్ బాడీగా తీర్చిదిద్దుకున్నవారే. అభిమానులను ఆకట్టుకునే శరీరాన్ని మలుచుకున్నవాళ్లే. ఇక టోన్డ్ బాడీ బిల్డింగ్ లో హీరోయిన్లదీ పెద్ద లిస్టే ఉంది. ఎందుకంటే అందంలో ముందుండేది ఈ ముద్దుగుమ్మలే కదా. నాజూకు చిన్నది కంగనా రనౌత్ టోన్డ్ బాడీ కోసం తెగ కష్టపడుతోంది. రోజూ యోగాసనాలు వేస్తోంది. కరాటే, జూడో, తైక్వాండో, కిక్ బాక్సింగ్ లాంటి సాహస విద్యల్నీ నేర్చేసుకుంటోంది ఈ ముద్దుగుమ్మ. అయితే టోన్డ్ బాడీలో కంగనా కంటే ముందుంది జీరో సైజ్ బెబో కరీనా కపూర్. చమ్మక్ చల్లో జోరుకు ముందే టోన్డ్ బాడీతో నిగారింపుతెచ్చుకుంది.
ఆరెంజ్ భామ షాజహాన్ పదమ్ సీ అయితే ఏకంగా మిగతా హీరోయిన్లకు మోడల్ గా నిలిచేంతగా బాడీని సొంతం చేసుకుంది. కత్తిలాంటి కత్రినా గురించి అసలు చెప్పనే అవసరం లేదు. పాలమీగడలాంటి శరీర ఛాయ, మెరిసిపోయే అందం కత్రినా సొంతం. ఇక కత్తిలా ఉండే మరో భామ దీపికా పదుకొనే. ఈ సుకుమారి కష్టమైన కసరత్తులన్నీ చేసి అందరినీ అట్రాక్ట్ చేసేటంత ఆకర్షణీయంగా మారింది.
టోన్డ్ బాడీ... సొంత చేసుకున్నవారు కొత్త నిగారింపుతో మెరిసిపోతారు. పెరిగిన ఆత్మవిశ్వాసంతో మురిసిపోతారు. కానీ శరీరాక్రుతి చక్కగా మారాలంటే జిమ్ లో కష్టమైన ఎక్సర్ సైజులు చేయాలి. కొన్ని త్యాగాలు తప్పవు. కేలరీల లెక్కన ఆహారాన్ని కొలిచి మరీ తినాలి. దీనికితోడు ఖరీదైన డైటీషియన్, యోగా గురువు, ఫిట్ నెస్ ట్రైనర్ కంపల్సరీ. ఎగ్జామ్ పుల్ గా షాహిద్ నే తీసుకోండి... టోన్డ్ బాడీ కోసం ఫేమస్ ఫిట్ నెస్ ట్రైనర్ అబ్బాస్ అలీని శిక్షకుడిగా నియమించుకున్నాడు. ఇక జాన్ అబ్రహం కిక్కురుమనకుండా వినోద్ చన్నా చెప్పింది విన్నాడు. నాన్ వెజ్ ను ఇష్టంగా తినే దీపికా పూర్తిగా ఆహార నియమాలనే మార్చేసింది. ఐదుగంటలకే లేచి బ్యాడ్మింటన్ ఆడేది. క్షణం తీరిక దొరికితే పైలేట్ వ్యాయామాలు చేసేది. ఇక పెద్దమొత్తంలో బరువు తగ్గాలనుకునే వాళ్లకి తేలికైన కార్బోహైడ్రేట్లు, కాటేజ్ ఛీజ్, సూప్, ప్రొటీన్ సప్లిమెంట్లు, బ్రౌన్ రైస్, పండ్ల రసాలు, తీపి బంగాళదుంపలే ఆహారం. దానికి తగ్గట్లు జిమ్ లు, కార్డియో వర్కవుట్లు కంపల్సరీ. ఇలా ఎన్ని త్యాగాలు చేయాలో మరి.
